Noyabrın 12-də Bakıda keçirilən COP29-un Liderlər Sammitinin açılışı, Azərbaycanın beynəlxalq səhnədəki mövqeyini daha da möhkəmləndirən və dünyaya ölkəmizin strateji əhəmiyyətini bir daha nümayiş etdirən tarixi bir an oldu. Prezident İlham Əliyevin bu sammitdəki çıxışı, yalnız Azərbaycanın qlobal məsələlərdəki fəal rolunu təsdiq etməklə yanaşı, həm də ölkəmizin uğurlarını və beynəlxalq münasibətlərdəki müstəqil mövqeyini açıq şəkildə ortaya qoydu. Onun sözləri, Azərbaycan xalqının birliyini və gücünü, eləcə də ölkənin qlobal təhlükəsizlik, enerji və sülh sahələrindəki strateji əhəmiyyətini dünyaya bəyan edən bir çağırış idi.

Prezident İlham Əliyevin çıxışının əsas mesajlarından biri, Azərbaycanın beynəlxalq diplomatiyada oynadığı mühüm rolu və bu rolu daha da gücləndirmək niyyətini açıq şəkildə ifadə etməsidir. Prezident, Azərbaycanın COP29-a ev sahibliyi etməsinin ölkəmizin beynəlxalq arenada göstərdiyi fəallığın və diplomatik uğurların təbii bir nəticəsi olduğunu vurğuladı. O, bildirib ki, Azərbaycana 200 ölkənin yekdil qərarı ilə bu şərəf verilib və bu, yalnız ölkəmizin gücünü deyil, həm də beynəlxalq münasibətlərdəki nüfuzunu göstərir. Prezidentin sözlərinə görə, Azərbaycanın COP29-a ev sahibliyi etməsi, ölkəmizin qlobal məsələlərə verdiyi töhfənin və beynəlxalq əlaqələrdəki etibarının təzahürüdür.

Bundan əlavə, Prezident İlham Əliyev çıxışında Azərbaycanın inkişaf etmiş və inkişaf etməkdə olan ölkələr arasında dialoq və əməkdaşlıq qurmaq istiqamətində atacağı addımları da qeyd etdi. Azərbaycan, COP29-un sədri kimi, inkişaf etmiş və inkişaf etməkdə olan ölkələr arasında birgə müzakirələr aparmaq və bu ölkələr arasında birləşdirici bir körpü rolunu oynamaq niyyətindədir. Bu, Prezidentin Azərbaycanın beynəlxalq diplomatiyasının "bütün dünya üçün faydalı əməkdaşlıq" prinsipi üzərində qurulduğunu göstərir. Həmçinin, Qlobal Şimal və Qlobal Cənub arasında qarşılıqlı faydalı əlaqələrin qurulmasının əhəmiyyətini vurğulayan İlham Əliyev, Azərbaycanın bu yolda müsbət təsir göstərmək üçün çalışacağını bildirdi.

Azərbaycanın qlobal enerji siyasətindəki roluna da geniş yer ayıran Prezident İlham Əliyev, ölkəmizin enerji sahəsindəki irimiqyaslı layihələrinin əhəmiyyətini bir daha xatırlatdı. Xüsusilə, Avropa ilə enerji sahəsindəki strateji əməkdaşlığın artdığı bir dövrdə, Azərbaycanın enerji təhlükəsizliyi və yaşıl enerji sahəsindəki təşəbbüsləri beynəlxalq miqyasda diqqət mərkəzindədir. Prezident çıxışında, Azərbaycanın Avropaya yaşıl enerji ötürmə layihəsinin həyata keçirilməsi üçün Qara dəniz altında enerji kabelinin texniki əsaslandırma işlərinin yekunlaşdığını açıqladı. Bu layihə, Azərbaycanın enerji sahəsindəki liderliyini yalnız neft və qazla məhdudlaşdırmır, həm də ölkəmizin təmiz enerji mənbələrinə yönələn böyük bir addım olduğunu göstərir.

Ölkəmizin multikulturalizm siyasətinin və mədəniyyətlərarası dialoqun fəal tərəfdarı olduğunu da vurğulayan Prezident İlham Əliyev, Azərbaycanın müxtəlif din və mədəniyyətlərin bir arada yaşadığı bir ölkə olduğunu, həmçinin bunun beynəlxalq münasibətlərdə Azərbaycanın böyük üstünlüyü olduğunu bildirdi. Azərbaycan, müxtəlif etnik və dini qrupların bir yerdə ahəngdar şəkildə yaşadığı bir ölkə kimi, qlobal miqyasda multikulturalizmin təbliğatında liderlik edir. Prezidentin çıxışı, ölkəmizin həm daxili həm də xarici siyasətinin çoxmədəniyyətli, inklüziv və sülhsevər bir şəkildə qurulduğunu göstərdi.

Prezidentin çıxışında diqqət çəkən digər mühüm bir məqam isə, Azərbaycanın öz gücü ilə beynəlxalq hüququ və ədaləti bərpa etməsi məsələsi oldu. İlham Əliyev, BMT Təhlükəsizlik Şurasının qətnamələrinin otuz il ərzində həyata keçirilməməsinə baxmayaraq, Azərbaycanın öz ərazi bütövlüyünü bərpa etməklə beynəlxalq hüququ və ədaləti müdafiə etdiyini vurğuladı. İkinci Qarabağ müharibəsində əldə edilən zəfər, Azərbaycanın suverenliyini və ərazi bütövlüyünü bərpa etməsi, yalnız Azərbaycanın özünün deyil, həm də beynəlxalq hüququn və ədalətin bərpa edilməsinə böyük bir töhfə idi.

Lakin Prezident İlham Əliyev, ölkəmizin müstəqilliyinə və beynəlxalq səhnədəki mövqeyinə qarşı yönəlmiş qarayaxma kampaniyalarına da toxundu. Azərbaycan, müxtəlif dairələrdən gələn təzyiqlərə və dezinformasiya kampaniyalarına qarşı çıxaraq, öz mövqeyini birmənalı şəkildə qoruyur. Prezident qeyd etdi ki, dünya artıq Bakıda toplaşır və ölkəmizin ev sahibliyi etdiyi COP29 Sammiti bunun əyani sübutudur. Azərbaycanın beynəlxalq əlaqələrdəki mövqeyinin bərpası, eyni zamanda, ölkəmizin ədalətə olan sədaqətinin və möhkəm prinsiplərinin ifadəsidir.

Prezident İlham Əliyevin bu çıxışı, Azərbaycanın dünya səhnəsində artan gücünü və mövqeyini bir daha təsdiqləyir. Ölkəmiz, yalnız öz sərhədlərində deyil, həm də qlobal siyasətdə mühüm bir rol oynayır. Azərbaycanın diplomatik fəallığı, enerji sahəsindəki təşəbbüsləri, multikulturalizmə olan yanaşması və beynəlxalq hüquqa olan sadiqliyi, onu dünyada etibarlı və güclü bir tərəfdaş halına gətirir. Bu, Azərbaycan üçün yeni bir dövrün başlanğıcı, dünyaya verdiyi güclü bir mesajdır: "Azərbaycan, qlobal təhlükəsizliyə və ədalətə sadiq qalaraq, gələcəyə doğru inamla irəliləyir."

Zamanova Mətanət
Xocalı rayon ziyalısı