2020-ci ilin payızında Azərbaycan xalqı tarixinin ən şanlı qələbələrindən birinə şahid oldu. 4 oktyabrda Cəbrayıl şəhəri 27 illik işğaldan azad olundu. Bu tarix artıq sadəcə bir qələbə deyil, xalqımızın milli qürur və həmrəylik gününə çevrilib.
Cəbrayıl Qarabağın cənub hissəsində, Azərbaycanın strateji baxımdan vacib bir nöqtəsində yerləşir. Şəhər 1993-cü ildə Ermənistanın hərbi qüvvələri tərəfindən işğal olunmuşdu. Bu dövr ərzində minlərlə insan öz doğma yurdlarından didərgin düşərək, məcburi köçkün həyatını yaşamaq məcburiyyətində qalmışdı. Uzun illər ərzində bu ərazilər boşaldılmış, talan edilmiş və Ermənistan tərəfindən sistematik olaraq dağıdılmışdı.
2020-ci ilin sentyabrında başlayan İkinci Qarabağ müharibəsi ilə Azərbaycanın güclü hərbi əməliyyatları nəticəsində strateji əhəmiyyətə malik olan Cəbrayıl şəhəri ordumuzun nəzarətinə keçdi. Bu hadisə Azərbaycanın İkinci Qarabağ müharibəsindəki ilk böyük şəhər qələbəsi kimi tarixə düşdü. Cəbrayılın azad olunması digər işğal altında olan ərazilərin azad edilməsinə də yeni üfüqlər açdı və ordumuzun qələbə əzmini daha da gücləndirdi.
Cəbrayılın azad edilməsi Azərbaycan xalqının həmrəyliyinin və ordumuzun peşəkarlığının bir göstəricisidir. Hərbçilərimizin döyüş meydanında göstərdiyi qəhrəmanlıq hər bir Azərbaycan vətəndaşının qəlbində iftixar hissi yaratdı. Bu qələbə bir daha sübut etdi ki, Azərbaycan xalqı öz torpaqlarını azad etmək, ərazi bütövlüyünü bərpa etmək əzminə sahibdir.
Azad olunandan sonra şəhər ciddi dağıntılara məruz qalmış vəziyyətdə idi. Azərbaycan dövləti dərhal bu ərazilərdə bərpa və yenidənqurma işlərinə başladı. Prezident İlham Əliyev tərəfindən irəli sürülən "Böyük Qayıdış" proqramı çərçivəsində Cəbrayılda həyat yenidən qurulur. Yollar, məktəblər, xəstəxanalar, infrastruktur obyektləri bərpa olunur. Məqsəd təkcə şəhəri yenidən tikmək deyil, həm də bu ərazilərə köçkünləri qaytarmaq, onların doğma torpaqlarında yeni həyat qurmasına şərait yaratmaqdır.
Cəbrayılın azadlığı təkcə hərbi qələbə deyil, həm də milli birliyin təntənəsidir. Bu qələbə, Qarabağın azadlığı uğrunda verilən şəhidlərin qanı bahasına əldə edilib. Bu səbəbdən 4 oktyabr Azərbaycan xalqının qürur və şərəf günüdür, həm də gələcək nəsillərə ötürüləcək böyük bir tarixdir.
Bu gün Cəbrayıl şəhəri yenidən dirçəlir. Azərbaycan xalqı üçün isə bu tarix hər zaman mübarizənin, qələbənin və yenidən doğuluşun simvolu olacaq.

Xocalı rayon gənci Afərim Lətifli