Prezident İlham Əliyevin AzTV-yə verdiyi son müsahibəsi bir daha Azərbaycan dövlətinin insanlara olan qayğısını və fövqəladə hadisələrdə operativ fəaliyyətini nümayiş etdirdi. Müsahibə zamanı Prezident AZAL-a məxsus təyyarənin Qazaxıstanın Aktau şəhəri yaxınlığında baş vermiş qəzası ilə bağlı ictimaiyyətə ətraflı məlumat verərək, hadisəyə dövlət səviyyəsində göstərilən reaksiyanın detallarını bölüşdü.

Dövlət başçısı vurğuladı ki, qəza ilə bağlı məlumatı aldığı andan dərhal və qətiyyətli addımlar atılıb. Təyyarə Bakıya qayıtdıqdan sonra keçirilən operativ müşavirədə hadisənin təhlili, zərərçəkənlərə dəstək və məsuliyyətli şəxslərin müəyyənləşdirilməsi üçün lazım olan bütün resursların səfərbər edildiyi bildirildi. Azərbaycan tərəfindən yaradılmış Dövlət Komissiyası hadisənin səbəblərinin obyektiv şəkildə araşdırılmasını təmin edir, bu da dövlətin şəffaflıq və məsuliyyət prinsipinə bağlılığını bir daha göstərir.

Prezident Əliyevin müsahibədə vurğuladığı ən mühüm məqamlar arasında zərərçəkənlərin ailələrinə göstərilən dəstək xüsusi yer tutur. Həlak olanların ailələrinə başsağlığı verilməsi, yaralıların dərhal tibbi yardım alması üçün lazımi tədbirlərin görülməsi və dövlətin bu məsələdə hərtərəfli yardıma hazır olduğu mesajı cəmiyyət tərəfindən yüksək qiymətləndirildi. Bu yanaşma, Azərbaycanın vətəndaşlarının rifahını hər zaman ön planda tutduğunu bir daha təsdiq edir.

Müsahibə eyni zamanda dövlətin təhlükəsizlik sahəsində gələcək planları ilə bağlı mühüm mesajlar verdi. Təyyarə qəzası kimi hadisələrin təkrarlanmaması üçün əlavə tədbirlərin görüləcəyi, aviasiya təhlükəsizliyi standartlarının daha da gücləndiriləcəyi vurğulandı. Bu addımlar həm ölkə daxilində, həm də beynəlxalq səviyyədə Azərbaycanın təhlükəsizlik sahəsində nümunəvi ölkə kimi mövqeyini möhkəmləndirir.

Bu müsahibə yalnız konkret bir hadisəyə reaksiya olmaqla qalmadı, eyni zamanda dövlət və xalq arasındakı birliyi və etimadı gücləndirən bir platforma oldu. Prezident İlham Əliyevin aydın və qətiyyətli çıxışı, Azərbaycanın hər bir vətəndaşının həyatına dəyər verdiyini və fövqəladə vəziyyətlərdə operativ addımlar atmağa hər zaman hazır olduğunu göstərdi.
Vəfa Məmmədova,
Xocalı şəhər 3 saylı tam orta məktəbin müəllimi