Xocalı rayon İcra Hakimiyyətinin başçısı Şahmar Usubov oktyabrın 11-də Gəncə şəhəri ərazisində salınmış 600 ailəlik qəsəbədə Xocalı rayon Kosalar kəndindən olan keçmiş məcburi köçkünlərlə görüş keçirdi. Görüşdə çıxış edən rayon icra hakimiyyətinin başçısı Şahmar Usubov Müzəffər Ali Baş Komandan İlham Əliyevin qətiyyətli siyasəti, dəmir yumruğu, rəşadətli ordumuzun hünəri, qəhrəman şəhidlərimizin şücaəti nəticəsində əldə etdiyimiz Böyük Zəfərdən danışdı. Mübarizəmizin məntiqi nəticəsi olaraq torpaqlarımızın suverenliyinin bərpa edildiyini qeyd edən Şahmar Usubov bunun xalqımız üçün ən böyük mənəvi sərvət olduğunu vurğuladı. Bildirdi ki, artıq qayıdış prosesi Kosalar sakinləri üçün başlamaq üzrədir. Kənd sakinləri üçün Xocalı rayonunun Ballıca kəndi nəzərdə tutulub. Qayıdış könüllülük prinsipi əsasında həyata keçiriləcək. Məskunlaşma zamanı əhalinin sosial rifahı, məşğuliyyəti, işlə təminatına dövlətimiz böyük dəstək göstərəcək.
Diskussiya şəklində davan edən tədbirdə sakinlər qayıdışla bağlı onları narahat edən məsələləri, həmçinin öz təkliflərini səsləndirdilər.