Xocalıdanam... Doğma yurdumun xatirəsi hər an qəlbimdədir, amma əlimdə qalan yalnız ocağımızın yanıq külü idi. Ürəyimdə bu acıyla yaşamaq çox çətin olub. Hər zaman xəyal edirdim ki, bir gün Azərbaycan torpaqları işğaldan azad olacaq, biz də doğma yerlərimizə dönəcəyik. 2020-ci ildəki Zəfər bizim üçün bir işıq oldu. Amma Prezident İlham Əliyevin Xankəndidə 15 oktyabr 2023-cü ildə bayrağımızı qaldırdığı gün, o qələbənin həqiqi şirinliyini hiss etdim. Həmin an sanki Xocalıya bir addım daha yaxınlaşdım...

Prezidentimizin o gün dediyi sözlər hamımız üçün çox böyük məna kəsb edirdi. "Azərbaycan xalqının yaddaşında əbədi yaşayacaq tarix" deyəndə, o anı dərindən hiss etdim. Biz 30 ildən çox gözləmişdik bu anı. 30 il idi ki, ürəyimizdə böyük bir boşluq vardı, doğma torpaqlarımızın itirilməsi acısı hər birimizin ruhuna işləyirdi. Amma artıq bu həsrət bitdi, böyük qələbəmiz gəldi. O an, Xankəndidə Azərbaycan Bayrağını dalğalanan görəndə, göz yaşlarımı saxlaya bilmədim. Hər birimiz bu bayrağın ucalmasını böyük bir qürur hissi ilə qarşıladıq. Axı illərdir ki, həmin torpaqlar bizdən alınmışdı, amma indi o torpaqlarda yenidən Azərbaycan nəfəsi duyulurdu.

Prezident İlham Əliyev çox böyük missiya yerinə yetirdi. Onun rəhbərliyi altında biz elə bir güc yaratdıq ki, dünyanın diqqətini çəkdik. Artıq Azərbaycanla hesablaşırlar, artıq torpaqlarımız üzərində suverenliyimizi bərpa etdik. Hər gün, hər saat o müqəddəs qələbə anına yaxınlaşırdıq. Və nəhayət, biz bunu qazandıq – bayrağımız yenidən işğaldan azad edilən torpaqlarda ucaldı.

Bu illər ərzində Azərbaycan gücləndi, iqtisadiyyatı gücləndi, ordusu gücləndi. Azərbaycan ordusu ilə fəxr edirəm, çünki məhz bu ordu bizim torpaqlarımızı geri aldı. Silahlı Qüvvələrimiz öz vəzifəsini layiqincə yerinə yetirdi. Biz 44 gün davam edən müharibədə öz haqqımızı döyüş meydanında bərpa etdik. Şuşanı azad edən o qəhrəman əsgərlər, zabitlər... Onlarla fəxr edirəm. Bizim qələbəmiz həm ordumuzun, həm də xalqımızın birliyi sayəsində mümkün oldu.

Bəli, bu antiterror əməliyyatı qaçılmaz idi. Düşmən 30 il ərzində torpaqlarımızda viranlıq yaratdı, insanlarımızı evlərindən didərgin saldı. Xocalıda olanları unuda bilmirəm – o soyuq qış gecəsində qətlə yetirilən günahsız soydaşlarımızı xatırlayıram. Amma indi biz həmin düşməni sülhə məcbur etdik. Düşmən artıq məğlubiyyətini qəbul etdi. Azərbaycan xalqı bu qələbəni qanı, canı bahasına əldə etdi. Və bu qələbə əbədi olacaq.

Bu gün Xankəndidə bayrağımızın ucalması, həm də Xocalı üçün bir ədalət günüdür. O gün mənim də ruhum şad oldu, mən də sanki doğma torpağıma bir addım yaxınlaşdım. O bayraq orada əbədi dalğalanacaq, bizim və gələcək nəsillərimizin qürur mənbəyi olacaq. Azərbaycanın şərəfli tarixi yazılır, və bu tarixin hər səhifəsində bizim qələbəmiz, gücümüz, xalqımızın iradəsi olacaq.

Prezident İlham Əliyevin Xankəndidə bayrağı ucaltdığı an, sanki Ulu Öndər Heydər Əliyevin ruhu da şad oldu. Onun siyasəti ilə başlayan bu mübarizə, Prezident İlham Əliyevin rəhbərliyi ilə zəfərlə nəticələndi. Bizdən sonra gələn nəsillər də bu qələbə ilə fəxr edəcəklər. Bu qələbə əbədi olaraq Azərbaycan xalqının yaddaşında yaşayacaq.

Bu gün Xocalıya, Ağdama, Füzuliyə, Şuşaya – bütün o viran olmuş yerlərə baxanda ürəyim dolur. Amma bilirəm ki, biz həmin yerləri yenidən dirçəldəcəyik. Erməni vəhşiliyindən qalan izlər silinəcək, yerinə Azərbaycanın müasir, inkişaf etmiş şəhərləri ucalacaq. Mən buna inanıram və bu inamla yaşayıram. Bayrağımızın Xankəndidə dalğalanması bizim üçün başlanğıcdır. Azərbaycanın gücü, xalqımızın birliyi, dövlətimizin iradəsi bizi bu günə gətirdi və bundan sonra da bizim işıqlı gələcəyimizi təmin edəcək.

Xocalının, Qarabağın, Azərbaycanın gələcəyi artıq bizim əlimizdədir.
Lamiyyə Qarayeva,
Xocalı rayon gənci