Əziz oxucular, bu gün Qarabağda baş verən inkişafları görmək, bəzən sadəcə sevinc gözyaşları ilə deyil, həm də qürurla izləyirik. Axı illərlə həsrətində olduğumuz torpaqlarımız indi yenidən canlanır, dirçəlir. Bu dirçəlişin içində idman çox xüsusi bir yer tutur. İdman təkcə sağlamlıq, güc və qələbə deyil, həm də bir ümid işığıdır.

Mən özüm də bu ərazilərdə doğulmuşam. Vaxtilə Qarabağın hər bir kəndində uşaqlar top qovur, çay kənarında üzmə yarışları keçirirdilər. İndi isə illər sonra doğma torpaqlarımıza qayıdarkən görürəm ki, həmin yerlərdə həyat yenidən başlayıb. Stadionlar tikilir, yeni idman meydançaları qurulur. Ağdamda tikilən o böyük stadion, məncə, Qarabağın simvolu olacaq – keçmişdəki itkilərimizin yerini indi gələcəyin qələbələri tutacaq.

Qarabağın dağlarında keçirilən veloyürüşləri, Suqovuşanda keçirilən avarçəkmə yarışları insanı necə sevindirməsin? Bu tədbirlər təkcə idman deyil, həm də dünyaya bir mesajdır: "Biz buradayıq, biz qayıtmışıq və biz yenidən inşa edirik!"

Amma, dostlar, gəlin bir məqamı da unutmayaq. Bu bərpa prosesində hamımızın rolu var. Hökumət stadionlar, idman kompleksləri tikir, amma o yerləri canlandırmaq üçün orada idman edən, yarışan, qələbə qazanan insanlara ehtiyac var. Bizim gənclərimiz orada aktiv olmalı, uşaqlarımız yenidən Qarabağda keçirilən oyunlarda iştirak etməlidirlər.

Hələ təsəvvür edin, gələcəkdə Qarabağ bir beynəlxalq idman mərkəzinə çevrilə bilər. Niyə də yox? Axı bizim bu torpaqlarda hər şey var – gözəl təbiət, zəhmətkeş insanlar və böyük potensial. Şuşada bir idman festivalı keçirilsə, nə qədər xarici turist gələcək, nə qədər insan Qarabağı görəcək. Bu, həm iqtisadi fayda gətirər, həm də dünyada Qarabağın adını bir daha eşidərik.

Bəli, dostlar, Qarabağda idman sadəcə bir fəaliyyət deyil, həm də yenidənqurma prosesinin simvoludur. Mənim qəlbimdə bir inam var: Qarabağ təkcə Azərbaycanın deyil, bütün dünyanın diqqət mərkəzinə çevriləcək. Gəlin bu işdə biz də dəstək olaq – istər bir velosiped sürərək, istər bir futbol oyununa baxaraq, istərsə də sadəcə Qarabağ haqqında danışaraq. Axı bu torpaqlar bizimdir, bu zəfər bizimdir!
Xocalı rayon gənci Afərim Lətifli